Gen 43 | WSK | STEP | Karak biya Canaan sor te mu me menayakaso. Se sor mu te na mena biya.

Genesis 43

Joseph ko laun ari Benjamin ilak Egypt namaman

1 Karak biya Canaan sor te mu me menayakaso. Se sor mu te na mena biya. 2 Jacob ko kuriang imas inang Egypt ago taiman mu no kutuwuman. Se Jacob ko kuriang nunga maonam, “Peleral Egypt namaral ale inang sang diaralko,” mam.

3 Bare Judah ko nuet Jacob maonam, “Ba, ana nika manorman. Egypt kari biya ana ining nangaram ale nanga maonam, anananga uria gotek me ilak namanak, mu ana nu koma dugu te me namanakko mam. 4 Se ba, ni balu se anananga uria ilak namanak mu asele ana nika na dianakko. 5 Bare ni me balu, mu ana me namanakkowo, mu awuk, kari mu balam ana nanga uria ilak me namanak, mu ana nu koma te me namanakko balam.”

6 Bare Jacob balam, “Se nina anape ko kari biya mu manorman, nina ninga uria gotek bo bagoso maman? Nina suwuta beteman mu ani ikup nunguningkiri aisiman!”

7 Se nuna balman, “Bare kari mu nanga dugu duap, se nanga launuria ko nanga isaru diruwu laga, ‘Ninga ba bagoso e?’ mam, aking ‘Ninga uria bo i bagoso e?’ mam se ana balman. Bare nu ana nanga uria ilak kote namanakko balukko mu ana me ikikasan.”

8 Se Judah ko nuet Jacob maonam, “Balu se Benjamin ani agarak tairuk se ko sinar to se tairatela namanakko. Mu asele ni se, anananga kuriang, se ana nangata na ko me kuenakkowo, yawarakala baganakko. 9 Ani agata ko sinar taikko. Bare ani ilak me pelerik tairik, mu tom ani ali imi te marak bagirik mu ikup mu aninga. 10 Bare ni Benjamin me guramem ale mu, ana maingkala tom ilagala ko Egypt namaman ale na ago taiman ale nowasan la.”

11 Se nunga nonet Jacob nunga maonam, “Ana lage bo na te aringinakko mena. Se kari biya balam butata beteralko. Imi te mel ningo ningo mu gial ninga korokem tugumal ale gial ago nama Egypt nunga kari biya mu munan tualko. Mel duap duap, honey, kanga, se mel siring ningo ningo mu gialko. 12 Ale manga bolala awural, ale sang ago bolala awural ale gial ago namaralko. Mu awuk, nuna manga ninga korokem ningi tuguman se giman ago taiman mu ko koma ago nama nungaralko. Ani betela me ikisam, nuna nungamili saparam se uwutata beteman agi? 13 Ale ninga uria tal ale ilak peleral kari mu kote namaralko. 14 Aninga ngatang mu iwita, Kaem Sokel Karogo mu ninga sanguk se kari mu gomang ningaruk ale ninga bo Simeon ningaruk, ale ninga uria Benjamin ago ningaruk se tairalko. Aninga kuriang aningate pelemon mu pelemon, mena mu mena.”

15 Se laun ari nunga munan mel bolala awuman, manga na te diara ko se, koma kutuwura ko, mu bolala awuman, ale nunga uria Benjamin taman ale ilak nama laga Egypt, Joseph kote arataman. 16 Joseph Benjamin arungu tairam se arigam, ale ko ura kari ko kawam bitaruwaram mu maonam, “Ni kari imi nunga gi nongorak aninga kawam te namar ale mel bo moar ale na kai kami nunguru sagerko,” mam. “Kari taiman imi woremkalal ani agarak na namonko.”

17 Se ura kari Joseph balam butata beteram ale arungu ko kawam te namaman. 18 Se ko laun ari nguangaman ale balukasan, “Ana nangarak imi te taiman mu duap ana motam motam taiman se nuna manga anananga korokem ningi tuguman borta ko! Nuna nanga ilumon ale ura dungan ko nanga awumonko, ale nanga donkey gimonko.”

19 Uwuta balman ale namaman kawam ko kuringi sanamaman ale Joseph ko ura kari kawam bitaruwaram mu manorman, 20 “Kari biya,” maman, “ni anananga den ikiko. Ana giringila la na diara ko imi te taiman. 21 Bare tom ana peleman nama lage te anira ko mu, ana suwan suwan anananga korokem kagorman ale ana nomoke nomoke nanga korokem ningi manga diram la peleram mu aringiman. Se aitak imi ana giman ago taiman. 22 Ale nanga manga sang na te dianakko agotala giman ago taiman. Bare ana kari ito manga anananga korokem ningi awuram mu ana me ko ikisan.”

23 Se ura kari mu balam, “Nina me nguangaralko,” mam. “Nenenga Kaem se nenenga nenet ko Kaem bore agila munan imi ninga korokem ningi awuram agila. Nenenga manga na te diaman mu ani taem.” Ura kari uwuta balam, ale udagi te Simeon tam ilak nongote tairam.

24 Ale nu nunga giam arungak Joseph ko kawam ningi kasu naguram. Ale yu nusuwik te anumonko mu giam ago tairam, asele nunga donkey na nungaram. 25 Nuna Joseph arungu woremkalal na naukko den ikiman, se nunga mel tutuk nuguting munan giman mu nungurman burangaman.

26 Ale kawam te bagaman se Joseph tairam. Se nuna nunga munan ago taiman mu karogo kote namaman tuman, ale moke dugu te taraman. 27 Se Joseph nunga isuam, “Nina ningo nuam bagasan agi memek e?” Aking nunga isuam, “Se ninga nenet aora balman se ani ikiem mu awuk, yawarakala bagoso e?”

28 Se nuna balman, “Anananga nainet, nika ura dungan, mu marak yawarakala bagoso,” maman. Ale nubugura kulukurman ale koma dugu te taraman.

29 Se Joseph ko uria nunguning Benjamin arigam ale balam, “Imi nenenga uria gotek nina giringila ko aninga manorman borta e?” Ale Benjamin maonam, “Kuriang, Kaem marak kisokko!” 30 Ale Joseph ko uria gotek ko gomang ninguru batagam ale niarukko pingi aram. Se tairate nunga beteram ko durumi kasu naguram ale mo niakaso.

31 Mo nia laga, koma motam anuwam ale nongote aratam. Ale noman magara mu am gomang ningi la se ko ura kari nunga maonam, “Na gial ago tairalko,” mam.

32 Se nuna Joseph ko na ko kuwim kigilik te beteman, ale ko launuria nunga mu kuwim kigilik beteman. Se Egypt kari Joseph ilak bagakasan mu kuwim kigilik te dagiman na nokasan. Mu awuk, Egypt alo Hebrew arungak na namonko me ta kuakasan. Mu nononga ikia te munan mu me terong nunguningkiri.

33 Se ura kari alo Joseph ko launuria nu koma dugu te kuwim nungarman, ale nunga nunam te nunga iluman wore te kuwim nungaru nungaru ago namaman se te dagiman. Nuna laun kotam mu te duap beteman ago nama mom kopa te. Se launuria mel mu aringiman ale nunumi ari gurugukasan ale ikia nunga moakaso. 34 Se ura kari mu launuria nunga na inang mu Joseph ko nana kuwim te giman ale nungarman. Bare Benjamin ko mu na biyala beteman, kari 5 na mu namonko iwita beteman. Se ko launuria Joseph ilak na yu naman, ale ninguru amilmilakasan.